Мэдээ

ХҮНИЙ ЭРХИЙН МЭДЛЭГ ОЛГОХ СУРГАЛТ ЗОХИОН БАЙГУУЛЛАА

Монгол Улсын Хүний эрхийн Үндэсний Комисстой хамтран хүний эрхийн зөрчлөөс урьдчилан сэргийлэх, хүний эрхийн мэдлэг олгох зорилгоор Дотоодын цэргийн анги, тусгай салбарын цэргийн ротын офицер, ахлагч болон хугацаат цэргийн алба хаагчдад өнөөдөр (2025.03.27) сургалт зохион байгууллаа.

Хүний эрхийн боловсрол хариуцсан референт О.Тодбулаг сургалтаар дараах зүйлсийг алба хаагчдад захилаа:

Хүний эрх гэдэг нь ганцхан эрхээ эдлэх тухай ойлголт биш бөгөөд хүний эрх, үүрэг хариуцлага 3-ын нэгдсэн ойлголтыг хүний эрх гэж ойлгодог.

Үндсэн хуульд зааснаар эх орноо хамгаалах, хуулийн дагуу цэргийн алба хаах үндсэн үүргээ биелүүлж буй хугацаат цэргийн алба хаагчид цэргийн цолны мөнгөн хангамж эдлэх, цэргийн дүрэмт хувцас, материал хэрэгслээр хангагдах, эрүүл мэндээ хамгаалуулах, эрх зөрчигдсөн асуудлаар санал, хүсэлт, гомдлоо бүх шатны захирагч, дарга нарт амаар болон бичгээр тавьж, шийдвэрлүүлэх эрхээ эдэлдэг.

Дээрх эрхийг баталгаатай эдлэхийн зэрэгцээ хугацаат цэргийн алба хаагчид бие биеийнхээ эрхийг зөрчихгүй, ялгаварлан гадуурхахгүй, хүний эрхийг хүндэтгэх үүрэгтэй гэдгийг онцоллоо.

Харин хугацаат цэргийн алба хаагчдаас та бүхэн ямар үүрэгтэй вэ? гэж асуухад:

Эх орон, төр, ард түмнээ хүндэтгэн дээдэлж, өргөсөн тангарагтаа үнэнч байх, хууль тогтоомж, цэргийн нийтлэг дүрмийг чанд сахин биелүүлэх, үүргээ эрэлхэг зоригтой, санаачилгатай, сахилгатай, үнэнч шударга биелүүлж, албаны болон байгууллагын нууц, задруулахгүй байх, эелдэг зан харилцааг эрхэмлэх үүрэгтэй хэмээлээ.