Мэдээ

ДОТООДЫН ЦЭРГИЙН БАЙГУУЛЛАГЫН “НЭГДСЭН ТООЛЛОГО”-ЫГ ЗОХИОН БАЙГУУЛЛАА

Монгол Улсад орчин цагийн Зэвсэгт хүчин үүсэн байгуулагдсаны 104 жилийн ой, “Монгол цэргийн өдөр”-ийг тохиолдуулан алба хаагчдын албандаа итгэх итгэл үнэмшлийг нэмэгдүүлэх, цэргийн албаар бахархах сэтгэлгээг хөгжүүлэх, байгууллагын түүхэн замнал, үндсэн чиг үүргийг иргэд, олон нийтэд сурталчлан таниулж, иргэн-цэргийн харилцааг бэхжүүлэх, цэрэг-эх оронч үзлийг түгээн дэлгэрүүлэх зорилгоор Улаанбаатар хот дахь анги, байгууллагын “Нэгдсэн тооллого”-ыг зохион байгууллаа.

Энэхүү арга хэмжээ өнөөдөр (2025.03.18) Үндэсний цэцэрлэгт хүрээлэнд байрлах “Дотоодын цэргийн хүндэтгэлийн хөшөө, цогцолбор”-т болж, үйл ажиллагаанд Дотоодын цэргийн штабын дарга, хурандаа М.Лувсандорж, Дэд бөгөөд Ажиллагааны удирдлагын газрын дарга, хурандаа Н.Мөнх-Итгэл, бригадын генерал Т.Хүрэлбаатар болон штабын даргын зөвлөлийн гишүүд, ахмад дайчид, ажилтан, алба хаагчдын төлөөлөл оролцов.

Тус арга хэмжээнд Дотоодын цэргийн Байлдааны туг, 05, 805, 809 дүгээр ангийн Байлдааны тугийг хүндэтгэн залж, Цэргийн тангараг давтах ажиллагаа, оройн нэгдсэн туяа тоог тус тус зохион байгууллаа.

Мөн хугацаат цэргийн алба хаагчдын бэлтгэсэн жагсаалын үзүүлэх тоглолт, гардан тулааны үзүүлэх тоглолтуудыг алба хаагчид болон иргэд, олон нийтэд толилууллаа.

МОНГОЛ ТӨРИЙН ДОТООДЫН ЦЭРГИЙН БАЙГУУЛЛАГЫН СҮР ХҮЧ, СҮЛД ХИЙМОРЬ ҮЕИЙН ҮЕД МАНДАН БАДРАХ БОЛТУГАЙ