100 жил
ДОТООДЫН ЦЭРГИЙН БАЙГУУЛЛАГЫН 2026 ОНЫ АВАРГА ШАЛГАРУУЛАХ “МАРШ ТАКТИК, ТУСГАЙ БЭЛТГЭЛИЙН ЦОГЦОЛБОР ТЭМЦЭЭН" ЭХЭЛЛЭЭ
ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠶ᠋ᠢᠨ ᠒᠐᠒᠖ ᠣᠨ ᠤ᠋ ᠠᠪᠤᠷᠭᠤ ᠰᠢᠯᠭᠠᠷᠠᠭᠤᠯᠬᠤ “ᠮᠠᠷᠱ ᠲᠠᠻᠲ᠋ᠢᠻ᠂ᠲᠤᠰᠬᠠᠢ ᠪᠡᠯᠡᠳᢈᠡᠯ ᠦ᠋ᠨ ᠴᠣᠭᠴᠠᠯᠠᠪᠤᠷᠢ ᠲᠡᠮᠡᠴᠡᢉᠡᠨ« ᠡᢈᠢᠯᠡᠯᠡ
ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠶ᠋ᠢᠨ ᠒᠐᠒᠖ ᠣᠨ ᠤ᠋ ᠠᠪᠤᠷᠭᠤ ᠰᠢᠯᠭᠠᠷᠠᠭᠤᠯᠬᠤ “ᠮᠠᠷᠱ ᠲᠠᠻᠲ᠋ᠢᠻ᠂ ᠲᠤᠰᠬᠠᠢ ᠪᠡᠯᠡᠳᢈᠡᠯ ᠦ᠋ᠨ ᠴᠣᠭᠴᠠᠯᠠᠪᠤᠷᠢ ᠲᠡᠮᠡᠴᠡᢉᠡᠨ ᠭᠠᠷᠤᠭᠠᠨ ᠤ᠋ ᠡᠮᠦᠨᠡᢈᠢ ᠠᠵᠢᠯᠯᠠᠭᠠ ᠪᠣᠯᠬᠤ «ᠵᠢᠭᠰᠠᠭᠠᠯ ᠤ᠋ᠨ ᠦᠵᠡᢉᠦᠯᢈᠦ ᠲᠣᠭᠯᠠᠯᠲᠠ»«, ︽ᠭᠠᠷᠳᠠᠨ ᠲᠤᠯᠤᠭᠠᠨ ᠤ᠋ ᠦᠵᠡᢉᠦᠯᢈᠦ ᠲᠣᠭᠯᠠᠯᠲᠠ»,︽ᠭᠠᠯ ᠤ᠋ᠨ ᠪᠡᠯᠡᠳᢈᠡᠯ ᠦ᠋ᠨ ᠨᠣᠷᠮᠠᠲ᠋ᠢᠸ«,︽ᢈᠢᠮᠢ ᠶ᠋ᠢᠨ ᠨᠣᠷᠮᠠᠲ᠋ᠢᠸ»,︽ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠨᠣᠷᠮᠠᠲ᠋ᠢᠸ"-ᠡᠶᠢ ᠶ᠋ᠢ ᢉᠦᠶᠢᠴᠡᠳᢈᠡᢈᠦ ᠵᠡᠷᢉᠡ ᠲᠥᠷᠦᠯ ᠢ᠋ᠶᠡᠷ ᠥᠨᠦᠳᠦᠷ (᠒᠐᠒᠖᠂᠐᠓᠂᠒᠕) ᠡᢈᠢᠯᠡᠯᠡ᠃ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠨᠢ ᠵᠢᠯ ᠪᠦᠷᠢ ᠮᠠᠷᠱ ᠲᠠᠻᠲ᠋ᠢᠻ᠂ᠲᠤᠰᠬᠠᠢ ᠪᠡᠯᠡᠳᢈᠡᠯ ᠦ᠋ᠨ ᠴᠣᠭᠴᠠᠯᠠᠪᠤᠷᠢ ᠲᠡᠮᠡᠴᠡᢉᠡᠨ ᠢ᠋ ᠵᠣᢈᠢᠶᠠᠨ ᠪᠠᠶᠢᠭᠤᠯᠵᠤ᠂ᠠᠯᠪᠠ ᠬᠠᠭᠠᠭᠴᠢᠳ ᠤ᠋ᠨ ᠢ᠋ᠶᠠᠨ ᠤᠷᠠ ᠴᠢᠳᠠᠪᠤᠷᠢ᠂ ᠪᠡᠯᠡᠳᢈᠡᠯᠵᠢᠯᠲᠡ ᠶ᠋ᠢᠨ ᠲᠦᠪᠰᠢᠨ ᠢ᠋ ᠲᠣᠭᠲᠠᠭᠠᠳᠠᠭ ᠤᠯᠠᠮᠵᠢᠯᠠᠯ ᠲᠠᠢ ᠪᠥᢉᠡᠳ ᠡᠨᠡ ᠵᠢᠯ ᠦ᠋ᠨ ᠬᠤᠪᠢ ᠳ᠋ᠤ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠶᠡᠷᠦᠩᢈᠡᠶᠢᠯᠡᢉᠴᠢ ᠶ᠋ᠢᠨ ᠨᠡᠷᠡᠮᠵᠢᠲᠦ ᠲᠥᠷᠦ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠣᠯᠤᠨ ᠬᠠᠤᠯᠢ ᠰᠠᢈᠢᠭᠤᠯᠬᠤ ᠪᠠᠶᠢᠭᠤᠯᠤᠯᠭᠠ ᠨᠤᠭᠤᠳ ᠤ᠋ᠨ ᠳᠤᠮᠳᠠ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠭᠳᠠᠬᠤ ᠮᠠᠷᠱ᠆ᠲᠤᠰᠬᠠᠢ ᠪᠡᠯᠡᠳᢈᠡᠯ ᠦ᠋ᠨ ᠴᠣᠭᠴᠠᠯᠠᠪᠤᠷᠢ ᠲᠡᠮᠡᠴᠡᢉᠡᠨ ᠳ᠋ᠦ ᠣᠷᠤᠯᠴᠠᠬᠤ ᠪᠠᠭ ᠲᠠᠮᠢᠷᠴᠢᠳ ᠢ᠋ ᠰᠣᠩᠭᠤᠨ ᠰᠢᠯᠭᠠᠷᠠᠭᠤᠯᠬᠤ ᠲᠣᠮᠤᠬᠠᠨ ᠰᠣᠷᠢᠯᠭᠠ ᠪᠣᠯᠵᠤ ᠪᠠᠶᠢᠭᠠ ᠪᠠᠷ ᠣᠨᠴᠠᠯᠢᠭ ᠪᠣᠯᠵᠤ ᠪᠠᠶᠢᠨᠠ᠃ ᠲᠡᢉᠦᠨᠴᠢᠯᠡᠨ ᠡᠨᠡ ᠤᠳᠠᠭᠠ ᠶ᠋ᠢᠨ ᠲᠡᠮᠡᠴᠡᢉᠡᠨ ᠳ᠋ᠦ ᠪᠠᠭ᠂ ᠲᠠᠮᠢᠷᠴᠢᠳ ᠢ᠋ ᠢᠵᠢᠯ ᠲᠦᠪᠰᠢᠨ ᠳ᠋ᠦ ᠥᠷᠢᠰᠦᠯᠳᠦᢈᠦ ᠪᠣᠯᠤᠮᠵᠢ ᠶ᠋ᠢ ᠣᠯᠭᠤᠵᠤ᠂ᠡᠷᠡᢉᠲᠡᠢ ᠑᠖᠂ ᠡᠮᠡᢉᠲᠡᠢ ᠕᠂ ᠳᠣᠲᠤᠭᠠᠳᠤ ᢈᠡᠷᠡᢉ ᠦ᠋ᠨ ᠶᠡᢈᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠣᠯᠤᠨ ᠬᠤᠭᠤᠴᠠᠭᠠᠲᠤ ᠴᠡᠷᠢᢉ ᠦ᠋ᠨ ᠠᠯᠪᠠ ᠬᠠᠭᠠᠭᠴᠢ ᠶ᠋ᠢᠨ ᠕ ᠪᠠᠭ ᠲᠤ ᠬᠤᠪᠢᠶᠠᠨ ᠥᠷᠢᠰᠦᠯᠳᠦᢉᠦᠯᠵᠦ ᠪᠠᠶᠢᠭᠠ ᠪᠥᢉᠡᠳ ᠲᠥᠪ᠂ᠣᠷᠤᠨ ᠨᠤᠲᠤᠭ ᠤ᠋ᠨ ᠠᠩᢉᠢ᠂ ᠲᠤᠰᠬᠠᠢ ᠰᠠᠯᠪᠤᠷᠢ ᠨᠤᠭᠤᠳ ᠠ᠋ᠴᠠ ᠨᠡᠶᠢᠲᠡ ᠒᠖ ᠪᠠᠭ ᠤ᠋ᠨ ᠔᠐᠐ ᠭᠠᠷᠤᠢ ᠲᠠᠮᠢᠷᠴᠢᠳ ᠣᠷᠤᠯᠴᠠᠵᠤ ᠪᠠᠶᠢᠨᠠ᠃ ᠮᠠᠷᠱ ᠲᠠᠻᠲ᠋ᠢᠻ᠂ ᠲᠤᠰᠬᠠᠢ ᠪᠡᠯᠡᠳᢈᠡᠯ ᠦ᠋ᠨ ᠴᠣᠭᠴᠠᠯᠠᠪᠤᠷᠢ ᠲᠡᠮᠡᠴᠡᢉᠡᠨ ᠨᠢ ᠬᠣᠶᠠᠷ ᠡᠳᠦᠷ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠭᠳᠠᠬᠤ ᠪᠥᢉᠡᠳ ᠡᠨᠡ ᠡᠳᠦᠷ ᠪᠠᠭ ᠲᠠᠮᠢᠷᠴᠢᠳ ᠭᠠᠷᠤᠭᠠᠨ ᠤ᠋ ᠡᠮᠦᠨᠡᢈᠢ ᠠᠵᠢᠯᠯᠠᠭᠠ ᠶ᠋ᠢ ᢈᠢᠵᠦ ᢉᠦᠶᠢᠴᠡᠳᢈᠡᢈᠦ ᠪᠣᠯ ᠮᠠᠷᠭᠠᠰᠢ ᠪᠤᠶᠤ ᠒᠐᠒᠖ ᠣᠨ ᠤ᠋ ᠐᠓ ᠳ᠋ᠤᠭᠠᠷ ᠰᠠᠷᠠ ᠶ᠋ᠢᠨ ᠒᠖᠆ᠤ᠋ ᠡᠳᠦᠷ ᠴᠠᠭᠳᠠᠭᠠ᠂ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠰᠤᠷᠭᠠᠯᠲᠠ ᠶ᠋ᠢᠨ ᠨᠢᢉᠡᠳᠦᢉᠰᠡᠨ ᠲᠥᠪ ᠦ᠋ᠨ ᠨᠠᠷᠠᠰᠤ ᠲᠠᠢ ᠳ᠋ᠠᢈᠢ ᢈᠡᢉᠡᠷᠡ ᠶ᠋ᠢᠨ ᠰᠤᠷᠭᠠᠯᠲᠠ ᠶ᠋ᠢᠨ ᢈᠡᠰᠡᢉ ᠲᠦ ᠲᠡᠮᠡᠴᠡᢉᠡᠨ ᠦ᠋ ᠦᠨᠳᠦᠰᠦᠨ ᢈᠡᠰᠡᢉ ᠪᠣᠯᠬᠤ ᠮᠠᠷᠱ ᠤ᠋ᠨ ᠵᠠᠮ ᠳ᠋ᠤ ᢉᠦᠶᠢᠴᠡᠳᢈᠡᢈᠦ ᠠᠵᠢᠯᠯᠠᠭᠠ ᠪᠠᠷ ᠦᠷᢉᠦᠯᠵᠢᠯᠡᢈᠦ ᠶᠤᠮ᠃ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠶᠡᠷᠦᠩᢈᠡᠶᠢᠯᠡᢉᠴᠢ ᠶ᠋ᠢᠨ ᠨᠡᠷᠡᠮᠵᠢᠲᠦ ᠲᠥᠷᠦ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠣᠯᠤᠨ ᠬᠠᠤᠯᠢ ᠰᠠᢈᠢᠭᠤᠯᠬᠤ ᠪᠠᠶᠢᠭᠤᠯᠤᠯᠭᠠ ᠨᠤᠭᠤᠳ ᠤ᠋ᠨ ᠳᠤᠮᠳᠠ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠭᠳᠠᠬᠤ ᠮᠠᠷᠱ᠆ᠲᠤᠰᠬᠠᠢ ᠪᠡᠯᠡᠳᢈᠡᠯ ᠦ᠋ᠨ ᠴᠣᠭᠴᠠᠯᠠᠪᠤᠷᠢ ᠲᠡᠮᠡᠴᠡᢉᠡᠨ ᠡᠴᠡ ᠒᠐᠐᠘ ᠣᠨ ᠳ᠋ᠤ ᠬᠤᠭᠤᠴᠠᠭᠠᠲᠤ ᠴᠡᠷᠢᢉ ᠦ᠋ᠨ ᠠᠯᠪᠠ ᠬᠠᠭᠠᠭᠴᠢᠳ ᠤ᠋ᠨ ᠰᠠᠯᠠᠭᠠ ᢈᠦᠷᠡᠯ ᠮᠧᠳᠠᠯ᠂᠒᠐᠑᠒ ᠣᠨ ᠳ᠋ᠤ ᠪᠠᠶᠢᠩᠭᠤ ᠶ᠋ᠢᠨ ᠪᠦᠷᠢᠯᠳᠦᢈᠦᠨ ᠦ᠋ ᠰᠠᠯᠠᠭᠠ ᢈᠦᠷᠡᠯ ᠮᠧᠳᠠᠯ᠂ ᠒᠐᠒᠓ ᠣᠨ ᠳ᠋ᠤ ᠪᠠᠶᠢᠩᠭᠤ ᠶ᠋ᠢᠨ ᠪᠦᠷᠢᠯᠳᠦᢈᠦᠨ ᠦ᠋ ᠰᠠᠯᠠᠭᠠ ᢈᠦᠷᠡᠯ ᠮᠧᠳᠠᠯ᠂ ᠒᠐᠒᠔ ᠣᠨ ᠳ᠋ᠤ ᠪᠠᠶᠢᠩᠭᠤ ᠶ᠋ᠢᠨ ᠪᠦᠷᠢᠯᠳᠦᢈᠦᠨ ᠦ᠋ ᠰᠠᠯᠠᠭᠠ ᠮᠥᠩᢉᠦᠨ ᠮᠧᠳᠠᠯ᠂ ᠬᠤᠭᠤᠴᠠᠭᠠᠲᠤ ᠴᠡᠷᠢᢉ ᠦ᠋ᠨ ᠠᠯᠪᠠ ᠬᠠᠭᠠᠭᠴᠢᠳ ᠤ᠋ᠨ ᠰᠠᠯᠠᠭᠠ ᢈᠦᠷᠡᠯ ᠮᠧᠳᠠᠯ (᠒᠐᠐᠘᠆᠒᠐᠒᠔ ᠣᠨ ᠤ᠋ ᠬᠣᠭᠤᠷᠤᠨᠳᠤ ᠨᠡᠶᠢᠲᠡ ᠔ ᢈᠦᠷᠡᠯ᠂ ᠑ ᠮᠥᠩᢉᠦ) ᠲᠤᠰ ᠲᠤᠰ ᢈᠦᠷᠲᠡᠵᠦ ᠪᠠᠶᠢᠭᠰᠠᠨ ᠠᠮᠵᠢᠯᠲᠠ ᠶ᠋ᠢ ᠦᠵᠡᢉᠦᠯᠦᢉᠰᠡᠨ ᠪᠠᠶᠢᠨᠠ᠃
Дотоодын цэргийн байгууллагын 2026 оны аварга шалгаруулах “Марш тактик, тусгай бэлтгэлийн цогцолбор тэмцээн гарааны өмнөх ажиллагаа болох "Жагсаалын үзүүлэх тоглолт", "Гардан тулааны үзүүлэх тоглолт", "Галын бэлтгэлийн норматив", "Химийн норматив", "Биеийн тамирын норматив"-ийг гүйцэтгэх зэрэг төрлөөр өнөөдөр (2026.03.25) эхэллээ.
Дотоодын цэргийн байгууллага нь жил бүр Марш тактик, тусгай бэлтгэлийн цогцолбор тэмцээнийг зохион байгуулж, алба хаагчдынхаа ур чадвар, бэлтгэлжилтийн түвшинг тогтоодог уламжлалтай бөгөөд энэ жилийн хувьд Монгол Улсын Ерөнхийлөгчийн нэрэмжит төрийн цэргийн болон хууль сахиулах байгууллагуудын дунд зохион байгуулагдах Марш-тусгай бэлтгэлийн цогцолбор тэмцээнд оролцох баг тамирчдыг сонгон шалгаруулах томоохон сорилго болж байгаагаар онцлог болж байна.
Түүнчлэн энэ удаагийн тэмцээнд баг, тамирчдыг ижил түвшинд өрсөлдөх боломжийг олгож, эрэгтэй 16, эмэгтэй 5, Дотоод хэргийн их сургуулийн болон хугацаат цэргийн алба хаагчийн 5 багт хуваан өрсөлдүүлж байгаа бөгөөд төв, орон нутгийн анги, тусгай салбаруудаас нийт 26 багийн 400 гаруй тамирчид оролцож байна.
Марш тактик, тусгай бэлтгэлийн цогцолбор тэмцээн нь хоёр өдөр зохион байгуулагдах бөгөөд энэ өдөр баг тамирчид Гарааны өмнөх ажиллагааг хийж гүйцэтгэх бол маргааш буюу 2026 оны 03 дугаар сарын 26-ны өдөр Цагдаа, Дотоодын цэргийн сургалтын нэгдсэн төвийн Нарстай дахь хээрийн сургалтын хэсэгт тэмцээний үндсэн хэсэг болох Маршийн замд гүйцэтгэх ажиллагаагаар үргэлжлэх юм.
Дотоодын цэргийн байгууллага Монгол Улсын Ерөнхийлөгчийн нэрэмжит төрийн цэргийн болон хууль сахиулах байгууллагуудын дунд зохион байгуулагдах Марш-тусгай бэлтгэлийн цогцолбор тэмцээнээс 2008 онд хугацаат цэргийн алба хаагчдын салаа хүрэл медаль, 2012 онд байнгын бүрэлдэхүүний салаа хүрэл медаль, 2023 онд байнгын бүрэлдэхүүний салаа хүрэл медаль, 2024 онд байнгын бүрэлдэхүүний салаа мөнгөн медаль, хугацаат цэргийн алба хаагчдын салаа хүрэл медаль (2008-2024 оны хооронд нийт 4 хүрэл, 1 мөнгө) тус тус хүртэж байсан амжилтийг үзүүлсэн байна.
