100 жил
"ЦЭРГИЙН ГУРВАН ТӨРӨЛТ" ТЭМЦЭЭН ЗОХИОН БАЙГУУЛАГДАЖ БАЙНА
ᠴᠡᠷᠢᢉ ᠦ᠋ᠨ ᠭᠤᠷᠪᠠᠨ ᠲᠥᠷᠦᠯᠲᠡ« ᠲᠡᠮᠡᠴᠡᢉᠡᠨ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠭᠳᠠᠵᠤ ᠪᠠᠶᠢᠨᠠ
ᠴᠠᠭᠳᠠᠭᠠ᠂ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠶ᠋ᠢᠨ ᠪᠡᠶᠡ ᠪᠦᠷᠢᠯᠳᠦᢈᠦᠨ ᠦ᠋ ᠪᠡᠶᠡ ᠪᠢᠯᠳᠠᠷ᠂ᠮᠡᠷᢉᠡᠵᠢᠯ ᠦ᠋ᠨ ᠤᠷᠠ ᠴᠢᠳᠠᠪᠤᠷᠢ᠂ ᠰᠡᠳᢈᠢᠯ ᠵᠦᠢ ᠶ᠋ᠢᠨ ᠪᠡᠯᠡᠳᢈᠡᠯ᠂ ᠬᠠᠤᠯᠢ ᠪᠠᠷ ᢈᠦᠯᠢᠶᠡᢉᠰᠡᠨ ᠴᠢᢉ ᠡᢉᠦᠷᢉᠡ ᠶ᠋ᠢ ᢉᠦᠶᠢᠴᠡᠳᢈᠡᢈᠦ ᠴᠢᠳᠠᠪᢈᠢ ᠶ᠋ᠢ ᠨᠡᠮᠡᢉᠳᠡᢉᠦᠯᢈᠦ ᠵᠣᠷᠢᠯᠭᠠ ᠪᠠᠷ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠱᠲ᠋ᠠᠪ ᠤ᠋ᠨ ᠨᠡᠷᠡᠮᠵᠢᠲᠦ ᠴᠠᠭᠳᠠᠭᠠ᠂ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠶ᠋ᠢᠨ ᠒᠐᠒᠖ ᠣᠨ ᠤ᠋ ᠠᠪᠤᠷᠭᠤ ᠰᠢᠯᠭᠠᠷᠠᠭᠤᠯᠬᠤ “ᠴᠡᠷᠢᢉ ᠦ᠋ᠨ ᠭᠤᠷᠪᠠᠨ ᠲᠥᠷᠦᠯᠲᠡ” ᠲᠡᠮᠡᠴᠡᢉᠡᠨ ᠢ᠋ ᠥᠨᠦᠳᠦᠷ (᠒᠐᠒᠖᠂᠐᠔᠂᠐᠒) ᠵᠡᠪᠰᠡᢉᠲᠦ ᢈᠦᠴᠦᠨ ᠦ᠋ ᠓᠑᠑ ᠳ᠋ᠦ᠋ᢉᠡᠷ ᠠᠩᢉᠢ ᠶ᠋ᠢᠨ ᠬᠤᠵᠢᠷᠪᠤᠯᠠᠩ ᠳ᠋ᠠᢈᠢ ᠵᠠᠰᠠᠪᠤᠷᠢ ᠬᠠᠩᠭᠠᠯᠲᠠ ᠶ᠋ᠢᠨ ᠲᠥᠪ ᠦ᠋ᠨ ᠰᠤᠷᠭᠠᠯᠲᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ ᠵᠣᢈᠢᠶᠠᠨ ᠪᠠᠶᠢᠭᠤᠯᠵᠤ ᠪᠠᠶᠢᠨᠠ᠃ ᠡᠨᠡ ᠤᠳᠠᠭᠠ ᠶ᠋ᠢᠨ ᠲᠡᠮᠡᠴᠡᢉᠡᠨ ᠢ᠋ ᠵᠡᠪᠰᠡᢉᠲᠦ ᢈᠦᠴᠦᠨ ᠦ᠋ ᠵᠠᠩᠵᠤᠨ ᠱᠲ᠋ᠠᠪ ᠤ᠋ᠨ ᠳᠠᠷᠤᠭᠠ ᠶ᠋ᠢᠨ ᠲᠤᠰᠢᠶᠠᠯ ᠢ᠋ᠶᠠᠷ ᠪᠠᠲᠤᠯᠠᠭᠰᠠᠨ ᠴᠡᠷᠢᢉᠵᠢᠯ ᠦ᠋ᠨ ᠰᠫᠣᠷᠲ ᠤ᠋ᠨ ᠳᠦᠷᠢᠮ ᠦ᠋ᠨ ᠳᠠᠭᠠᠭᠤ ᠪᠤᠤᠳᠠᠯᠭᠠ᠂ᢉᠷᠠᠨᠠᠲ ᠰᠢᠳᠡᠯᠲᠡ᠂ ᠓᠐᠐᠐ ᠮᠧᠲ᠋ᠷ ᠦ᠋ᠨ ᢉᠦᠶᠦᠯᠲᠡ ᢉᠡᠰᠡᠨ ᠦᠨᠳᠦᠰᠦᠨ ᠭᠤᠷᠪᠠᠨ ᠲᠥᠷᠦᠯ ᠢ᠋ᠶᠡᠷ ᠵᠣᢈᠢᠶᠠᠨ ᠪᠠᠶᠢᠭᠤᠯᠵᠤ᠂ ᠴᠠᠭᠳᠠᠭᠠ᠂ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠓᠖ ᠠᠩᢉᠢ᠂ ᠪᠠᠶᠢᠭᠤᠯᠤᠯᠭᠠ ᠶ᠋ᠢᠨ ᠑᠐᠘ ᠲᠠᠮᠢᠷᠴᠢᠨ ᠬᠤᠷᠳᠤ ᢈᠦᠴᠦ᠂ ᠠᠪᠬᠠᠯᠵᠢ ᠰᠠᠮᠪᠠᠭᠠ ᠪᠠᠨ ᠰᠣᠷᠢᠨ ᠥᠷᠢᠰᠦᠯᠳᠦᠵᠦ ᠪᠠᠶᠢᠨᠠ᠃ ᠴᠡᠷᠢᢉᠵᠢᠯ ᠦ᠋ᠨ ᠰᠫᠤᠷᠲ ᠨᠢ ᠲᠥᠷᠦ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠶ᠋ᠢᠨ ᠪᠡᠶᠡ ᠪᠦᠷᠢᠯᠳᠦᢈᠦᠨ ᠦ᠋ ᠪᠠᠶᠢᠯᠳᠤᠭᠠᠨ ᠤ᠋ ᠪᠣᠯᠤᠨ ᠮᠡᠷᢉᠡᠵᠢᠯ ᠦ᠋ᠨ ᠪᠡᠯᠡᠳᢈᠡᠯ ᠦ᠋ᠨ ᠤᠷᠠ ᠴᠢᠳᠠᠪᠤᠷᠢ ᠶ᠋ᠢ ᠳᠡᢉᠡᢉᠰᠢᠯᠡᢉᠦᠯᠵᠦ᠂ᠪᠡᠶᠡ ᠪᠢᠯᠳᠠᠷ᠂ ᠰᠡᠳᢈᠢᠯ ᠵᠦᠢ ᠶ᠋ᠢᠨ ᠥᠨᠳᠦᠷ ᠠᠴᠢᠶᠠᠯᠠᠯ ᠢ᠋ ᠳᠠᠪᠠᠨ ᠲᠤᠭᠤᠯᠬᠤ ᠴᠢᠳᠠᠪᠤᠷᠢ ᠶ᠋ᠢ ᠬᠠᠩᠭᠠᠬᠤ ᠳ᠋ᠤ ᠴᠢᢉᠯᠡᢉᠰᠡᠨ ᠴᠡᠷᠢᢉ ᠦ᠋ᠨ ᠨᠣᠷᠮᠠᠲ᠋ᠢᠸ᠂ᠰᠫᠣᠷᠲ ᠤ᠋ᠨ ᠲᠥᠷᠦᠯ ᠦ᠋ᠳ ᠢ᠋ ᠪᠠᠭᠲᠠᠭᠠᠭᠰᠠᠨ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠵᠣᠷᠢᠯᠲᠠᠲᠤ ᠦᠶᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᢈᠡᠯᠡᠳᠡᢉ ᠪᠥᢉᠡᠳ ᠴᠠᠭᠳᠠᠭᠠ᠂ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠠᠩᢉᠢ᠂ ᠪᠠᠶᠢᠭᠤᠯᠤᠯᠭᠠ ᠶ᠋ᠢᠨ ᢈᠡᠮᠵᠢᠶᠡᠨ ᠳ᠋ᠦ ᠠᠩᠬᠠ ᠤᠳᠠᠭᠠ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠭᠳᠠᠵᠤ ᠪᠠᠶᠢᠭᠠ ᠪᠠᠷ ᠣᠨᠴᠠᠯᠢᠭ ᠶᠤᠮ᠃ ᠮᠥᠨ ᠡᠨᠡ ᢈᠦ ᠲᠡᠮᠡᠴᠡᢉᠡᠨ ᠨᠢ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠶᠡᠷᠦᠩᢈᠡᠶᠢᠯᠡᢉᠴᠢ ᠶ᠋ᠢᠨ ᠨᠡᠷᠡᠮᠵᠢᠲᠦ ᠲᠥᠷᠦ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠣᠯᠤᠨ ᠬᠠᠤᠯᠢ ᠰᠠᢈᠢᠭᠤᠯᠬᠤ ᠪᠠᠶᠢᠭᠤᠯᠤᠯᠭᠠ ᠨᠤᠭᠤᠳ ᠤ᠋ᠨ ᠳᠤᠮᠳᠠ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠭᠳᠠᠬᠤ ᠮᠠᠷᠱ᠆ᠲᠤᠰᠬᠠᠢ ᠪᠡᠯᠡᠳᢈᠡᠯ ᠦ᠋ᠨ ᠴᠣᠭᠴᠠᠯᠠᠪᠤᠷᠢ ᠲᠡᠮᠡᠴᠡᢉᠡᠨ ᠳ᠋ᠦ ᠣᠷᠤᠯᠴᠠᠬᠤ ᠪᠠᠭ ᠲᠠᠮᠢᠷᠴᠢᠳ ᠢ᠋ ᠰᠣᠩᠭᠤᠨ ᠰᠢᠯᠭᠠᠷᠠᠭᠤᠯᠬᠤ ᠲᠣᠮᠤᠬᠠᠨ ᠰᠣᠷᠢᠯᠭᠠ ᠪᠣᠯᠵᠤ ᠪᠠᠶᠢᠨᠠ᠃
Цагдаа, дотоодын цэргийн байгууллагын бие бүрэлдэхүүний бие бялдар, мэргэжлийн ур чадвар, сэтгэл зүйн бэлтгэл, хуулиар хүлээсэн чиг үүргийг гүйцэтгэх чадавхыг нэмэгдүүлэх зорилгоор Дотоодын цэргийн штабын нэрэмжит Цагдаа, дотоодын цэргийн байгууллагын 2026 оны аварга шалгаруулах “Цэргийн гурван төрөлт” тэмцээнийг өнөөдөр (2026.04.02) Зэвсэгт хүчний 311 дүгээр ангийн Хужирбулан дахь Засвар хангалтын төвийн сургалтын талбайд зохион байгуулж байна.
Энэ удаагийн тэмцээнийг Зэвсэгт хүчний Жанжин штабын даргын тушаалаар баталсан Цэрэгжлийн спортын дүрмийн дагуу буудлага, гранат шидэлт, 3000 метрийн гүйлт гэсэн үндсэн гурван төрлөөр зохион байгуулж, цагдаа, дотоодын цэргийн 36 анги, байгууллагын 108 тамирчин хурд хүч, авхаалж самбаагаа сорин өрсөлдөж байна.
Цэрэгжлийн спорт нь төрийн цэргийн байгууллагын бие бүрэлдэхүүний байлдааны болон мэргэжлийн бэлтгэлийн ур чадварыг дээшлүүлж, бие бялдар, сэтгэл зүйн өндөр ачааллыг даван туулах чадварыг хангахад чиглэсэн цэргийн норматив, спортын төрлүүдийг багтаасан биеийн тамирын зорилтот үйл ажиллагааг хэлдэг бөгөөд цагдаа, дотоодын цэргийн анги, байгууллагын хэмжээнд анх удаа зохион байгуулагдаж байгаагаар онцлог юм.
Мөн энэхүү тэмцээн нь Монгол Улсын Ерөнхийлөгчийн нэрэмжит төрийн цэргийн болон хууль сахиулах байгууллагуудын дунд зохион байгуулагдах Марш-тусгай бэлтгэлийн цогцолбор тэмцээнд оролцох баг тамирчдыг сонгон шалгаруулах томоохон сорилго болж байна
