100 жил
ТАНГАРАГ ӨРГӨХ ЁСЛОЛЫН АРГА ХЭМЖЭЭ БОЛЛОО
ᠲᠠᠩᠭᠠᠷᠢᠭ ᠡᠷᢉᠦᢈᠦ ᠶᠣᠰᠤᠯᠠᠯ ᠤ᠋ᠨ ᠠᠷᠭᠠ ᢈᠡᠮᠵᠢᠶᠡ ᠪᠣᠯᠤᠯᠠ
ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠳ᠋ᠤ ᠒᠐᠒᠖ ᠣᠨ ᠤ᠋ ᠨᠢᢉᠡᠳᠦᢉᠡᠷ ᠡᢉᠡᠯᠵᠢ ᠶ᠋ᠢᠨ ᠲᠠᠲᠠᠯᠭᠠ ᠪᠠᠷ ᠲᠠᠲᠠᠭᠳᠠᠨ ᠢᠷᠡᠵᠦ᠂ᠴᠡᠷᠢᢉ ᠦ᠋ᠨ ᠠᠩᠬᠠᠨ ᠱᠠᠲᠤᠨ ᠤ᠋ ᠪᠡᠯᠡᠳᢈᠡᠯ ᠡᠵᠡᠮᠰᠢᢉᠦᠯᢈᠦ ᠰᠤᠷᠭᠠᠯᠲᠠ ᠳ᠋ᠤ ᠬᠠᠮᠤᠷᠤᠭᠳᠠᠭᠰᠠᠨ ᠬᠤᠭᠤᠴᠠᠭᠠᠲᠤ ᠴᠡᠷᠢᢉ ᠦ᠋ᠨ ᠠᠯᠪᠠ ᠬᠠᠭᠠᠭᠴᠢᠳ ᠤ᠋ᠨ «ᠴᠡᠷᠢᢉ ᠦ᠋ᠨ ᠲᠠᠩᠭᠠᠷᠢᠭ ᠡᠷᢉᠦᢈᠦ ᠶᠣᠰᠤᠯᠠᠯ ᠤ᠋ᠨ ᠠᠷᠭᠠ ᢈᠡᠮᠵᠢᠶᠡ» ᠥᠨᠦᠳᠦᠷ (᠒᠐᠒᠖᠂᠐᠖᠂᠑᠗) ᠦᠨᠳᠦᠰᠦᠨ ᠦ᠋ ᠴᠡᠴᠡᠷᠯᠢᢉᠲᠦ ᢈᠦᠷᠢᠶᠡᠯᠡᠩ ᠳ᠋ᠡᢈᠢ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᢈᠦᠨᠳᠦᠳᢈᠡᠯ ᠦ᠋ᠨ ᢈᠥᠰᠢᠶᠡ᠂ᠴᠣᠭᠴᠠᠯᠠᠪᠤᠷᠢ ᠳ᠋ᠤ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠭᠳᠠᠯᠠ᠃ ᠲᠠᠩᠭᠠᠷᠢᠭ ᠡᠷᢉᠦᢈᠦ ᠶᠣᠰᠤᠯᠠᠯ ᠤ᠋ᠨ ᠠᠷᠭᠠ ᢈᠡᠮᠵᠢᠶᠡᠨ ᠳ᠋ᠦ ᠳᠠᠶᠢᠴᠢᠨ ᠤᠯᠠᠮᠵᠢᠯᠠᠯ᠂ᠠᠯᠳᠠᠷ ᠭᠠᠪᠢᠶᠠᠨ ᠤ᠋ ᠢᠯᠡᠷᢈᠡᠶᠢᠯᠡᠯ ᠪᠥᢉᠡᠳ ᠪᠡᠶᠡ ᠪᠦᠷᠢᠯᠳᠦᢈᠦᠨ ᠦ᠋ ᠡᠷᢈᠢᠮᠯᠡᠨ ᠳᠡᢉᠡᠳᠦᠯᠡᢈᠦ ᠠᠷᠢᠭᠤᠨ ᠰᠢᠲᠦᢉᠡᠨ᠂ ᠵᠣᠯᠪᠤᠭᠠ ᢈᠡᠶᠢᠮᠣᠷᠢ ᠶ᠋ᠢᠨ ᠪᠡᠯᢉᠡᠳᠡᠯ ᠪᠣᠯᠤᠭᠰᠠᠨ ᠪᠠᠶᠢᠯᠳᠤᠭᠠᠨ ᠤ᠋ ᠲᠤᠭ ᠢ᠋ ᢈᠦᠨᠳᠦᠳᢈᠡᠨ ᠵᠠᠯᠠᠵᠤ᠂ ᠴᠡᠷᠢᢉ ᠦ᠋ᠨ ᠲᠠᠩᠭᠠᠷᠢᠭ ᠡᠷᢉᠦᢈᠦ ᠶᠣᠰᠤᠯᠠᠯ ᠤ᠋ᠨ ᠠᠵᠢᠯᠯᠠᠭᠠ ᠡᢈᠢᠯᠡᢉᠰᠡᠨ ᠶᠤᠮ᠃ ᠡᠨᠡ ᢈᠦ ᠦᠶᠢᠯᠡ ᠠᠵᠢᠯᠯᠠᠭᠠᠨ ᠳ᠋ᠤ ᠴᠠᠭᠳᠠᠭᠠ ᠶ᠋ᠢᠨ ᠶᠡᠷᠦᠩᢈᠡᠢ ᠭᠠᠵᠠᠷ ᠤ᠋ᠨ ᠳᠠᠷᠤᠭᠠ᠂ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠻᠣᠮᠮᠠᠨ᠋ᠳ᠋ᠯᠠᠭᠴᠢ᠂ ᠬᠣᠰᠢᠭᠤᠴᠢ ᢉᠧᠨᠧᠷᠠᠯ ᠵᠠ᠂ᠪᠣᠯᠤᠳ᠂ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠱᠲ᠋ᠠᠪ ᠤ᠋ᠨ ᠳᠠᠷᠤᠭᠠ᠂ ᠬᠤᠷᠠᠩᠳᠠ ᠨ᠂ᡀᠠᠭᠪᠠᠰᠠᠶᠢᠬᠠᠨ᠂ ᠴᠠᠭᠳᠠᠭᠠ ᠶ᠋ᠢᠨ ᠶᠡᠷᠦᠩᢈᠡᠢ ᠭᠠᠵᠠᠷ ᠤ᠋ᠨ ᠵᠠᢈᠢᠷᠭᠠᠨ ᠤ᠋ ᠤᠳᠤᠷᠢᠳᠤᠯᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠳᠠᠷᠤᠭᠠ᠂ᠴᠠᠭᠳᠠᠭᠠ ᠶ᠋ᠢᠨ ᠬᠤᠷᠠᠩᠳᠠ ᠫ᠂ᠪᠠᠲᠤᠪᠠᠭᠠᠲᠤᠷ᠂ ᠨᠡᠶᠢᠰᠯᠡᠯ ᠦ᠋ᠨ ᠴᠡᠷᠢᢉ ᠦ᠋ᠨ ᠱᠲ᠋ᠠᠪ ᠤ᠋ᠨ ᠳᠠᠷᠤᠭᠠ᠂ᠬᠤᠷᠠᠩᠳᠠ ᠭ᠂ᠢᠯᠠᠯᠲᠠ᠂ ᠳᠣᠲᠤᠭᠠᠳᠤ ᠶ᠋ᠢᠨ ᠱᠲ᠋ᠠᠪ ᠤ᠋ᠨ ᠵᠠᢈᠢᠷᠭᠠᠨ ᠤ᠋ ᠤᠳᠤᠷᠢᠳᠤᠯᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠳᠠᠷᠤᠭᠠ᠂ᠬᠤᠷᠠᠩᠳᠠ ᠬᠠ᠂ᠨᠠᠷᠠᠨᠪᠠᠭᠠᠲᠤᠷ ᠪᠣᠯᠤᠨ ᠱᠲ᠋ᠠᠪ ᠤ᠋ᠨ ᠳᠠᠷᠤᠭᠠ ᠶ᠋ᠢᠨ ᠵᠥᠪᠯᠡᠯ ᠦ᠋ᠨ ᢉᠡᠰᠢᢉᠦᠳ᠂ ᠲᠠᠩᠭᠠᠷᠢᠭ ᠡᠷᢉᠦᢈᠦ ᠬᠤᠭᠤᠴᠠᠭᠠᠲᠤ ᠴᠡᠷᠢᢉ ᠦ᠋ᠨ ᠠᠯᠪᠠ ᠬᠠᠭᠠᠭᠴᠢᠳ᠂ ᠠᠬᠠᠮᠠᠳ ᠠᠵᠢᠯᠲᠠᠨ᠂ ᠠᠯᠪᠠ ᠬᠠᠭᠠᠭᠴᠢᠳ᠂ ᠠᠷᠤ ᢉᠡᠷ ᠦ᠋ᠨ ᠲᠥᠯᠦᢉᠡᠯᠡᠯ ᠪᠣᠯᠬᠤ ᠑᠕᠐᠐ ᠭᠠᠷᠤᠢ ᢈᠦᠮᠦᠨ ᠣᠷᠤᠯᠴᠠᠭᠰᠠᠨ ᠶᠤᠮ᠃ ᠠᠷᠭᠠ ᢈᠡᠮᠵᠢᠶᠡᠨ ᠦ᠋ ᢈᠦᠷᠢᠶᠡᠨ ᠳ᠋ᠦ ᠰᠢᠨᠡᢈᠡᠨ ᠳᠠᠶᠢᠴᠢᠳ ᠑ ᠰᠠᠷᠠ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ ᠪᠡᠯᠡᠳᢈᠡᢉᠰᠡᠨ ᠭᠠᠷᠳᠠᠨ ᠲᠤᠯᠤᠭᠠᠨ᠂ᠵᠡᠪᠰᠡᢉᠲᠡᠢ᠂ ᠵᠡᠪᠰᠡᢉ ᠦᢉᠡᠢ ᠵᠢᠭᠰᠠᠭᠠᠯ ᠤ᠋ᠨ ᠦᠵᠡᢉᠦᠯᢈᠦ ᠲᠣᠭᠯᠠᠯᠲᠠ᠂ ᠤᠷᠠᠯᠢᠭ ᠤ᠋ᠨ ᠲᠣᠭᠯᠠᠯᠲᠠ ᠶ᠋ᠢ ᠦᠵᠡᢉᠦᠯᠵᠦ᠂ ᠴᠡᠷᠢᢉ ᠡᢈᠡ ᠣᠷᠤᠨᠴᠢ ᢈᠦᠮᠦᠵᠢᠯ᠂ ᠴᠡᠷᠢᢉ ᠦ᠋ᠨ ᠡᠷᠳᠡᠮ ᠳ᠋ᠦ ᢈᠡᠷᢈᠢᠨ ᠰᠤᠷᠤᠯᠴᠠᠵᠤ ᠪᠤᠢ ᠪᠠᠨ ᠳᠠᠷᠤᠭᠠ ᠵᠠᢈᠢᠷᠤᠭᠴᠢ᠂ ᠠᠷᠤ ᢉᠡᠷ ᠦ᠋ᠨ ᢈᠢᠨ ᠳ᠋ᠦ ᠪᠡᠨ ᠰᠣᠨᠢᠷᠬᠠᠭᠤᠯᠤᠯᠠ᠃ ᠴᠡᠷᠢᢉ ᠦ᠋ᠨ ᠲᠠᠩᠭᠠᠷᠢᠭ ᠨᠢ ᠴᠡᠷᠢᢉ ᠦ᠋ᠨ ᠠᠯᠪᠠᠨ ᠬᠠᠭᠠᠭᠴᠢ ᠶ᠋ᠢᠨ ᠡᢈᠡ ᠣᠷᠤᠨ᠂ᠲᠥᠷᠦ᠂ ᠠᠷᠠᠳ ᠲᠦᠮᠡᠨ ᠦ᠋ ᠪᠡᠨ ᠡᠮᠦᠨᠡ ᠡᠷᢉᠦᢉᠰᠡᠨ ᠠᠨᠳᠠᠭᠠᠢ ᠪᠥᢉᠡᠳ ᠮᠣᠩᠭᠣᠯ ᠤᠯᠤᠰ ᠢ᠋ᠶᠠᠨ ᠪᠠᠲᠤᠯᠠᠨ ᠬᠠᠮᠠᠭᠠᠯᠠᠬᠤ ᠠᠰᠤᠷᠤ ᠶᠡᢈᠡ ᠦᠨᠡ ᠴᠢᠨ᠂ᠡᢉᠦᠷᢉᠡ᠂ ᠬᠠᠷᠢᠭᠤᠴᠠᠯᠭᠠ ᢈᠦᠯᠢᠶᠡᠯᢉᠡᢉᠰᠡᠨ ᠢᠲᠡᢉᠡᠯ ᠨᠠᠶᠢᠳᠠᠪᠤᠷᠢ ᠪᠥᢉᠡᠳ ᠴᠡᠷᠢᢉ ᠦ᠋ᠨ ᠠᠯᠪᠠᠨ ᠠ᠋ᠴᠠ ᠥᠪᠡᠷ ᠢ᠋ ᠪᠡᠨ ᠣᠯᠵᠤ ᠲᠠᠨᠢᠬᠤ᠂ᠠᠯᠤᠰ ᠤ᠋ᠨ ᠬᠠᠷᠠᠭᠠ ᠢᠷᠡᢉᠡᠳᠦᠢ ᠪᠡᠨ ᠲᠣᠳᠤᠷᠬᠠᠶᠢᠯᠠᠬᠤ᠂ ᠡᢈᠡ ᠣᠷᠤᠨᠴᠢ ᠦᠵᠡᠯ ᠢ᠋ᠶᠡᠷ ᠲᠥᠯᠦᠪᠰᠢᢈᠦ᠂ ᠲᠡᠰᠪᠦᠷᠢ ᠬᠠᠲᠠᠭᠤᠵᠢᠯᠲᠠᠢ ᠪᠣᠯᠬᠤ ᠣᠯᠠᠨ ᠡᠷᢈᠢᠮ ᠴᠢᠨᠠᠷ ᠢ᠋ ᠡᠵᠡᠮᠰᠢᢈᠦ ᠶᠤᠮ᠃ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠳ᠋ᠤ ᠠᠯᠪᠠ ᠬᠠᠭᠠᠵᠤ ᠪᠤᠢ ᠬᠤᠭᠤᠴᠠᠭᠠᠲᠤ ᠴᠡᠷᠢᢉ ᠦ᠋ᠨ ᠠᠯᠪᠠ ᠬᠠᠭᠠᠭᠴᠢᠳ ᠢ᠋ ᠠᠯᠪᠠ ᠬᠠᠭᠠᠬᠤ ᠬᠤᠭᠤᠴᠠᠭᠠᠨ ᠳ᠋ᠤ ᠨᠢ ᠮᠡᠷᢉᠡᠵᠢᠯ ᠣᠯᠭᠤᠵᠤ᠂ᠴᠠᠭᠳᠠᠭᠠ᠂ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠠᠯᠪᠠ ᠬᠠᠭᠠᠭᠴᠢ ᠪᠠᠷ ᠪᠡᠯᠡᠳᢈᠡᢈᠦ᠂ ᠮᠥᠨ ᠨᠡᠶᠢᢉᠡᠮ ᠳ᠋ᠦ ᠡᠷᠢᠯᠲᠡᠲᠡᠢ ᠮᠡᠷᢉᠡᠵᠢᠯ ᠡᠴᠡ ᠰᠣᠩᠭᠤᠨ ᠡᠵᠡᠮᠰᠢᢉᠦᠯᠵᠦ᠂ᠮᠡᠷᢉᠡᠵᠢᠯᠲᠡᠢ ᠪᠣᠯᠪᠠᠰᠤᠨ ᢈᠦᠴᠦᠨ ᠢ᠋ ᠪᠡᠯᠡᠳᢈᠡᢈᠦ᠂ ᠵᠢᠯᠤᠭᠤᠳᠬᠤ ᠡᠷᢈᠡ ᠣᠯᠭᠤᠬᠤ ᠰᠤᠷᠭᠠᠯᠲᠠ ᠳ᠋ᠤ ᠬᠠᠮᠤᠷᠤᠭᠤᠯᠤᠨ ᠠ᠂B ᠠᠩᢉᠢᠯᠠᠯ ᠤ᠋ᠨ ᠵᠢᠯᠤᠭᠤᠨ ᠤ᠋ ᠦᠨᠡᠮᠯᠡᢈᠦ ᠣᠯᠭᠤᠭᠤᠯᠤᠨ ᠵᠠᠯᠠᠭᠤ ᠦᠶᠡ ᠶ᠋ᠢᠨ ᢈᠢᠨ ᠦ᠋ ᠠᠵᠢᠯ᠂ ᠠᠮᠢᠳᠤᠷᠠᠯ ᠤ᠋ᠨ ᠭᠠᠷᠤᠭᠠ ᠶ᠋ᠢ ᠵᠥᠪ ᠢ᠋ᠶᠡᠷ ᠡᢈᠢᠯᠡᢉᠦᠯᢈᠦ ᠶ᠋ᠢ ᠵᠣᠷᠢᠨ ᠠᠵᠢᠯᠯᠠᠵᠤ ᠪᠠᠶᠢᠨᠠ᠃ ᠡᢈᠡ ᠣᠷᠤᠨ ᠢ᠋ᠶᠠᠨ ᠬᠠᠮᠠᠭᠠᠯᠠᠬᠤ᠂ ᠬᠠᠤᠯᠢ ᠶ᠋ᠢᠨ ᠳᠠᠭᠠᠭᠤ ᠴᠡᠷᠢᢉ ᠦ᠋ᠨ ᠠᠯᠪᠠ ᠬᠠᠭᠠᠬᠤ ᠦᠨᠳᠦᠰᠦᠨ ᠡᢉᠦᠷᢉᠡ ᠪᠡᠨ ᠪᠡᠶᠡᠯᠡᢉᠦᠯᢈᠦ ᠪᠡᠷ ᠰᠡᠳᢈᠢᠯ ᠦ᠋ᠨ ᠳᠠᠭᠤᠳᠠᠯᠭᠠ᠂ᢈᠦᠰᠡᠯ ᠡᠷᠡᠮᠡᠯᠵᠡᠯ ᠳ᠋ᠦ ᠪᠡᠨ ᢈᠥᠲᠦᠯᠦᢉᠳᠡᠨ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠳ᠋ᠤ ᠲᠠᠲᠠᠭᠳᠠᠨ ᠢᠷᠡᠵᠦ᠂ᠴᠡᠷᠢᢉ ᠦ᠋ᠨ ᠠᠩᠬᠠᠨ ᠱᠠᠲᠤᠨ ᠤ᠋ ᠪᠡᠯᠡᠳᢈᠡᠯ ᠡᠵᠡᠮᠰᠢᢉᠦᠯᢈᠦ ᠰᠤᠷᠭᠠᠯᠲᠠ ᠪᠠᠨ ᠠᠮᠵᠢᠯᠲᠠᠲᠠᠢ ᠳᠦᢉᠦᠷᢉᠡᠨ᠂ ᠴᠡᠷᠢᢉ ᠦ᠋ᠨ ᠲᠠᠩᠭᠠᠷᠢᠭ ᠢ᠋ᠶᠠᠨ ᠡᠷᢉᠦᠵᠦ᠂ ᠠᠪᠤ᠂ ᠡᠵᠢ ᠶ᠋ᠢᠨ ᢈᠦᠦ ᠡᠴᠡ ᠡᢈᠡ ᠣᠷᠤᠨ ᠤ᠋ ᠴᠡᠷᠢᢉ ᠪᠣᠯᠵᠤ ᠪᠠᠶᠢᠭᠠ ᠳᠠᠶᠢᠴᠢᠳ ᠲᠤ ᠪᠠᠨ ᠬᠠᠯᠠᠭᠤᠨ ᠪᠠᠶᠠᠷ ᢈᠦᠷᢉᠡᠶᠡ᠃ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠳᠣᠲᠤᠭᠠᠳᠤ ᠶ᠋ᠢᠨ ᠴᠡᠷᠢᢉ ᠦ᠋ᠨ ᠪᠠᠶᠢᠭᠤᠯᠤᠯᠭᠠ ᠶ᠋ᠢᠨ ᠰᠦᠷ ᢈᠦᠴᠦ᠂ ᠰᠦᠯᠳᠡ ᢈᠡᠶᠢᠮᠤᠷᠢ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ ᠮᠠᠨᠳᠤᠨ ᠪᠠᠳᠠᠷᠠᠬᠤ ᠪᠣᠯᠲᠤᠭᠠᠢ!
Дотоодын цэргийн байгууллагад 2026 оны нэгдүгээр ээлжийн татлагаар татагдан ирж, цэргийн анхан шатны бэлтгэл эзэмшүүлэх сургалтад хамрагдсан хугацаат цэргийн алба хаагчдын "Цэргийн тангараг өргөх ёслолын арга хэмжээ" өнөөдөр (2026.06.17) Үндэсний цэцэрлэгт хүрээлэн дэх Дотоодын цэргийн хүндэтгэлийн хөшөө, цогцолборт зохион байгуулагдлаа.
Энэхүү үйл ажиллагаанд Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд, Дотоодын цэргийн штабын дарга, хурандаа Н.Лхагвасайхан, Цагдаагийн ерөнхий газрын Захиргааны Удирдлагын газрын дарга, цагдаагийн хурандаа П.Батбаатар, Нийслэлийн цэргийн штабын дарга, хурандаа Г.Ялалт, Дотоодын штабын Захиргааны удирдлагын газрын дарга, хурандаа Х.Наранбаатар болон штабын даргын зөвлөлийн гишүүд, тангараг өргөх хугацаат цэргийн алба хаагчид, ахмад ажилтан, алба хаагчид, ар гэрийн төлөөлөл болох 1500 гаруй хүн оролцсон юм.
Дотоодын цэргийн байгууллагад алба хааж буй хугацаат цэргийн алба хаагчдыг алба хаах хугацаанд нь мэргэжил олгож, цагдаа, дотоодын цэргийн алба хаагчаар бэлтгэх, мөн нийгэмд эрэлттэй мэргэжлээс сонгон эзэмшүүлж, мэргэжилтэй боловсон хүчнийг бэлтгэх, жолоодох эрх олгох сургалтад хамруулан А,B ангиллын жолооны үнэмлэх олгуулан залуу үеийнхний ажил, амьдралын гарааг зөвөөр эхлүүлэхийг зорин ажиллаж байна.
Эх орноо хамгаалах, хуулийн дагуу цэргийн алба хаах үндсэн үүргээ биелүүлэхээр сэтгэлийн дуудлага, хүсэл эрмэлзэлдээ хөтлөгдөн Дотоодын цэргийн байгууллагад татагдан ирж, цэргийн анхан шатны бэлтгэл эзэмшүүлэх сургалтаа амжилттай дүүргэн, цэргийн тангаргаа өргөж, аав, ээжийн хүүгээс эх орны цэрэг болж байгаа дайчдадаа халуун баяр хүргэе.
МОНГОЛ УЛСЫН ДОТООДЫН ЦЭРГИЙН БАЙГУУЛЛАГЫН СҮР ХҮЧ, СҮЛД ХИЙМОРЬ ҮЕИЙН ҮЕД МАНДАН БАДРАХ БОЛТУГАЙ!
